తెలుగు ప్రేక్షకులు ఎప్పుడూ కొత్త కాన్సెప్ట్‌లకు ఆసక్తి చూపిస్తారు. అయితే, ఆ కాన్సెప్ట్‌ను నమ్మదగిన రీతిలో చెప్పగలిగితేనే సినిమా హిట్ అవుతుంది. సుధీర్ బాబు హీరోగా నటించిన తాజా చిత్రం జటాధర కూడా అలాంటి కొత్త కాన్సెప్ట్‌తో ముందుకు వచ్చింది. కానీ దురదృష్టవశాత్తూ, ఈ సినిమా ఆ ఆలోచనను తెరమీద సరైన రీతిలో చూపించలేకపోయింది.
కథ పరంగా చూస్తే, శివ (సుధీర్ బాబు) అనే యువకుడు ఆత్మలు, దయ్యాలు, తాంత్రిక శక్తులపై పరిశోధన చేస్తుంటాడు. ఆ అంశాలపై పుస్తకం రాయాలని నిర్ణయించుకుంటాడు. సితార (దివ్య ఖోస్లా)తో ప్రేమలో ఉంటాడు. ఒకరోజు రుద్రాయపురం అనే గ్రామానికి వెళ్లి అక్కడ ఉన్న పురాతన భవనంలో తాంత్రిక రహస్యాలను తెలుసుకోవాలని ప్రయత్నిస్తాడు. అయితే, ఆ గ్రామంలో ఉన్న ధన పిశాచి (సోనాక్షి సిన్హా) అతని జీవితాన్ని పూర్తిగా మార్చేస్తుంది. శివ కుటుంబానికి గతంలో జరిగిన అన్యాయానికి ప్రతీకారం తీర్చుకునే క్రమంలో అతను చేసే పోరాటమే కథ.
సినిమా మొదటి భాగం ఆసక్తిగా మొదలవుతుంది. అయితే కథనం మెల్లగా నెమ్మదిస్తుంది. తాంత్రిక ఎలిమెంట్స్ ఉన్నా కూడా సస్పెన్స్, థ్రిల్లింగ్ లేకపోవడం వల్ల ప్రేక్షకుడు కనెక్ట్ కావడం కష్టం. పేరెంట్స్ సెంటిమెంట్ అనే మంచి పాయింట్‌ను దర్శకులు సరిగ్గా ప్యాక్ చేయలేకపోవడం సినిమా బలహీనతగా మారింది. శివ తల్లిదండ్రుల పాత్రలు (రాజీవ్ కనకాల, ఝాన్సీ) కథలో ముఖ్యమైనవి అయినప్పటికీ, వాటిని సరిగా డెవలప్ చేయకపోవడం ప్రేక్షకుడిని నిరుత్సాహపరుస్తుంది.
సుధీర్ బాబు తన వంతు ప్రయత్నం మాత్రం చేశాడు. పాత్ర బలహీనమైనప్పటికీ, తన నటనతో సినిమాలో కొంత ప్రాణం పోశాడు. అతని బాడీ లాంగ్వేజ్, యాక్షన్ సీన్లు బాగున్నా, కథ ఆ ఎఫెక్ట్‌ను నిలబెట్టలేకపోయింది. సోనాక్షి సిన్హా తెలుగు సినిమాతో ఎంట్రీ ఇస్తున్నప్పటికీ, ఆమె పాత్రకు బలం లేకపోవడం వల్ల గుర్తుండిపోయేలా చేయలేకపోయింది. శిల్పా శిరోద్కర్ వంటి సీనియర్ యాక్ట్రెస్‌కీ స్క్రీన్ టైమ్ తక్కువగా ఉండడం ఒక లోపం.
సాంకేతికంగా చూస్తే, సినిమాటోగ్రఫీ ఫర్వాలేదు. కొంతమేరకు స్క్రీన్ కలర్స్ ఆకట్టుకుంటాయి. కానీ గ్రాఫిక్స్ మాత్రం తక్కువ స్థాయిలో ఉండటం, తాంత్రిక సన్నివేశాల ప్రభావాన్ని తగ్గించింది. సంగీతం విషయంలో కూడా ఎలాంటి కొత్తతనం కనిపించదు. బ్యాక్‌గ్రౌండ్ స్కోర్ సస్పెన్స్ సీన్లలో కూడా సరిగ్గా లిఫ్ట్ చేయలేకపోయింది. ఎడిటింగ్‌లో మరింత జాగ్రత్త వహించి ఉంటే సినిమా కొంత క్రిస్ప్‌గా, రసవత్తరంగా ఉండేది.
ప్రొడక్షన్ వ్యాల్యూస్ కూడా చాలా సాదాసీదాగా అనిపిస్తాయి. క్లైమాక్స్ సీక్వెన్స్‌లో కూడా నాటకీయత మిస్ అయింది. మొత్తం మీద దర్శకులు వెంకట్ కల్యాణ్, అభిషేక్ జైస్వాల్ మంచి కాన్సెప్ట్ ఉన్నా దాన్ని నమ్మదగిన కథగా మార్చడంలో విఫలమయ్యారు. సుధీర్ బాబు కూడా తన ప్రయత్నం చేసినా కథ బలహీనత వల్ల ప్రేక్షకుడిని ఆకట్టుకోలేకపోయాడు.
జటాధరలో కొంత మిస్టిక్ ఫీల్ ఉన్నప్పటికీ, బలహీనమైన కథ, నిస్సత్తువైన స్క్రీన్‌ప్లే సినిమాను కిందకు లాగేశాయి. థియేటర్‌కి వెళ్లి చూడాల్సినంత ప్రభావం ఈ సినిమాలో లేదు. కొద్ది రోజుల్లో ఓటిటీలో చూడటం మేలు అనిపించే రేంజ్‌లో ఈ సినిమా నిలిచింది.
రేటింగ్: 2/5