పద్మశ్రీ మొగిలయ్యకు అవమానం: సాంస్కృతిక నిర్లక్ష్యాన్ని ప్రశ్నిస్తున్న వేణు ఊడుగుల వీడియో

పద్మశ్రీ అవార్డు గ్రహీత, మెట్ల కిన్నెర కళాకారుడు దర్శనం మొగిలయ్య (Darshan Mogilayya) కు జరిగిన అవమానం ఇప్పుడు తెలుగు రాష్ట్రాల్లో తీవ్ర చర్చకు దారి తీసింది. ఈ ఘటనకు సంబంధించిన ఒక షాకింగ్ వీడియోను రాజు వెడ్స్ రాంబాయి (Raju Weds Rambai) సినిమా నిర్మాత, ప్రముఖ దర్శకుడు వేణు ఊడుగుల (Venu Udugula) సోషల్ మీడియాలో షేర్ చేయడంతో విషయం మరింత వైరల్‌గా మారింది.

హైదరాబాద్ (Hyderabad) లోని ఓ ఫ్లైఓవర్ పిల్లర్‌పై, పద్మశ్రీ మొగిలయ్య గౌరవార్థం గీసిన చిత్రపటంపై రాజకీయ నాయకుల పోస్టర్లు, సినిమాలకు సంబంధించిన ప్రచార పోస్టర్లు అంటించబడటం తీవ్ర వివాదానికి కారణమైంది. ప్రజల గౌరవానికి ప్రతీకగా నిలవాల్సిన ఆ చిత్రపటం, అనవసరమైన పోస్టర్లతో కప్పబడటాన్ని చూసిన మొగిలయ్య తీవ్రంగా కలత చెందారు. ఎవరినీ నిందించకుండా, స్వయంగా ఆయనే తన చిత్రపటంపై అంటించిన పోస్టర్లను తొలగించడం అందరినీ కదిలించింది.

ఈ ఘటనకు సంబంధించిన వీడియో సోషల్ మీడియాలో వైరల్ (Viral Video) కావడంతో పలువురు సినీ, సాంస్కృతిక ప్రముఖులు స్పందిస్తున్నారు. ముఖ్యంగా మెట్ల కిన్నెర (Metla Kinnera) కళకు జాతీయ స్థాయిలో గుర్తింపు తీసుకొచ్చిన వ్యక్తికి ఇలా జరగడం పట్ల తీవ్ర ఆవేదన వ్యక్తమవుతోంది. ప్రజా స్థలాల్లో కళాకారుల గౌరవాన్ని కాపాడాల్సిన బాధ్యత ఎవరిది అనే ప్రశ్నలు వినిపిస్తున్నాయి.

ఈ క్రమంలో దర్శకుడు వేణు ఊడుగుల తన స్పందనను ట్విట్టర్ (Twitter) వేదికగా వెల్లడించారు. మొగిలయ్య తన చిత్రపటంపై అంటించిన పోస్టర్లను తానే తొలగిస్తున్న వీడియోపై స్పందిస్తూ, ఆయన ఒక భావోద్వేగభరితమైన పోస్ట్ చేశారు.
“పద్మశ్రీ పొందిన ముఖం కూడా మనలో కొందరికి ఖాళీ గోడలా కనిపిస్తే, ఇది అవమానం కాదు. మన సాంస్కృతిక స్పృహ ఎక్కడో బలహీనపడుతోందని చెప్పే నిశ్శబ్ద సంకేతం. మొగిలయ్య గారు తన బొమ్మపై అంటించిన పోస్టర్లను తానే తొలగించుకుంటున్న ఆ సందర్భం చాలా విచారకరం. ఇది ఎవరి మీద ఆరోపణ కాదు. మనలోని నిర్లక్ష్యానికి నిలువెత్తు సాక్ష్యం ఈ సంఘటన” అంటూ వేణు ఊడుగుల ఆవేదన వ్యక్తం చేశారు.

అంతేకాదు, ఈ అంశంపై తగిన చర్యలు తీసుకోవాలనే ఉద్దేశంతో తెలంగాణ ముఖ్యమంత్రి కార్యాలయం (Telangana CMO), తెలంగాణ చీఫ్ సెక్రెటరీ (Telangana Chief Secretary), జీహెచ్‌ఎంసీ (GHMC), జీహెచ్‌ఎంసీ కమిషనర్ (GHMC Commissioner) అధికారిక ట్విట్టర్ ఖాతాలను కూడా ఆయన ట్యాగ్ చేశారు. ఇది కేవలం ఒక వ్యక్తికి జరిగిన అవమానం కాదని, మొత్తం సమాజం తన సాంస్కృతిక విలువలను ఎలా చూస్తోందన్నదానికి నిదర్శనమని ఆయన సూచించారు.

పద్మశ్రీ మొగిలయ్య వంటి కళాకారులు తరతరాలుగా ప్రజల సంస్కృతిని నిలబెట్టిన ప్రతినిధులు. అలాంటి వ్యక్తుల గౌరవాన్ని కాపాడడంలో వ్యవస్థలు విఫలమవుతున్నాయా అనే చర్చ ఇప్పుడు మొదలైంది. ఈ ఘటనపై ప్రభుత్వ విభాగాలు ఎలా స్పందిస్తాయన్నది వేచి చూడాల్సిన అంశంగా మారింది. కనీసం ఇప్పటికైనా ప్రజా ప్రదేశాల్లో ఉన్న కళాకారుల చిత్రాలు, విగ్రహాలకు రక్షణ కల్పించే విధానాలు అమలు చేయాలని పలువురు డిమాండ్ చేస్తున్నారు.

పద్మశ్రీ పొందిన ముఖం కూడా మనలో కొందరికి
ఖాళీ గోడలా కనిపిస్తే, ఇది అవమానం కాదు.
మన cultural consciousness ఎక్కడో బలహీనపడుతోందని చెప్పే నిశ్శబ్ద సంకేతం.
మొగిలయ్య గారు తన బొమ్మపై అంటించిన పోస్టర్లను తానే తొలగించుకుంటున్న ఆ సందర్భం
చాలా విచారకరం. నిజానికి ఇది ఎవరి మీద ఆరోపణ కాదు.… pic.twitter.com/eCnJ8Jz9xb

— v e n u u d u g u l a (@venuudugulafilm) December 17, 2025