దేశవ్యాప్తంగా రాష్ట్రీయ స్వయంసేవక్ సంఘ్ (RSS) శతాబ్ది ఉత్సవాలు ఘనంగా జరుగుతున్నాయి. 1925లో స్థాపించబడిన ఈ సంస్థ ఇప్పుడు తన 100వ వార్షికోత్సవంలో అడుగుపెట్టింది. ఈ సందర్భంగా దేశమంతా వివిధ సాంస్కృతిక, సామాజిక కార్యక్రమాలతో ఉత్సవ వాతావరణం నెలకొంది. హిందూ సమాజ ఏకత, యువతలో దేశభక్తిని పెంపొందించడం, సామాజిక సామరస్యాన్ని బలపరచడం లక్ష్యంగా ఆర్‌ఎస్‌ఎస్‌ అనేక సేవా కార్యక్రమాలను చేపట్టింది.
2025 అక్టోబర్ 2న విజయదశమి నాడు శతజయంతి వేడుకలను అధికారికంగా ప్రారంభించిన RSS, ఈ ఏడాది పొడవునా “100 ఇయర్స్ ఆఫ్ ది సంఘ్: న్యూ హారిజన్స్” పేరుతో దేశవ్యాప్తంగా ఉపన్యాసాలు, సదస్సులు, సాంస్కృతిక ప్రదర్శనలు నిర్వహిస్తోంది. ఈ కార్యక్రమాల్లో ముఖ్యంగా విద్య, సాహిత్యం, కళలు, పరిపాలన, జర్నలిజం, ఆధ్యాత్మికత వంటి రంగాల ప్రముఖులను భాగస్వామ్యం చేయడం విశేషం.
ఈ క్రమంలో, సర్ సంఘచాలక్ డాక్టర్ మోహన్ భగవత్ నవంబర్ 8–9 తేదీల్లో కర్ణాటక రాజధాని బెంగళూరులో కీలక ప్రసంగం ఇవ్వనున్నారు. ఈ ఉపన్యాసం బనశంకరిలోని హోసకరేహల్లి రింగ్ రోడ్‌ వద్ద ఉన్న పిఇఎస్ విశ్వవిద్యాలయం వేదికగా జరుగుతుంది. ఆహ్వానిత అతిథులకు మాత్రమే ప్రవేశం ఉన్న ఈ కార్యక్రమంలో దక్షిణాది రాష్ట్రాలైన కర్ణాటక, ఆంధ్రప్రదేశ్, తెలంగాణ, తమిళనాడు, కేరళ రాష్ట్రాల నుండి దాదాపు 1,200 మంది విశిష్టులు పాల్గొంటారు. వీరిలో సాహిత్యవేత్తలు, కళాకారులు, శాస్త్రవేత్తలు, పరిశ్రమాధిపతులు, జర్నలిస్టులు, ఆధ్యాత్మిక నేతలు ఉంటారు.
ఇది “100 Years of Sangh: New Horizons” సిరీస్‌లో రెండవ ఉపన్యాసం. మొదటి ఉపన్యాసం 2025 ఆగస్టు 26–28 తేదీల్లో న్యూఢిల్లీలో జరిగింది. మిగిలిన రెండు ఉపన్యాసాలు ముంబై మరియు కోల్‌కతా నగరాల్లో జరగనున్నాయి. ఈ సిరీస్ ద్వారా మోహన్ భగవత్ సంఘ్ ఆలోచన, అభివృద్ధి దిశ, సామాజిక మార్పు పట్ల దృక్పథం వంటి అంశాలపై తన దృక్కోణాన్ని పంచుకుంటారు.
ఈ కార్యక్రమాల ద్వారా ఆర్‌ఎస్‌ఎస్‌ తన శతాబ్దపు ప్రయాణాన్ని తిరిగి పరిశీలిస్తూ, భారతదేశ సమాజ నిర్మాణంలో తన పాత్రను మరింత బలపరచాలని సంకల్పించింది. దేశవ్యాప్తంగా సంఘ్ కార్యకర్తలు “సంఘం సతజయంతి – భారతం వైభవ శతాబ్దం” అనే నినాదంతో పలు సేవా కార్యక్రమాలు నిర్వహిస్తున్నారు.