బిగ్ బాస్ 9 చివరి వారం: తనూజ, పవన్ జర్నీలతో ఎమోషనల్ ఎపిసోడ్

బిగ్ బాస్ తెలుగు సీజన్ 9 (Bigg Boss Telugu Season 9) చివరి వారంలోకి అడుగుపెట్టడంతో హౌస్ వాతావరణం పూర్తిగా భావోద్వేగంగా మారింది. ఫినాలే దగ్గరపడుతుండటంతో, హౌస్‌లో మిగిలిన ప్రతి కంటెస్టెంట్ ప్రయాణాన్ని బిగ్ బాస్ ప్రత్యేకంగా గుర్తు చేస్తున్నారు. ఈ క్రమంలో 102వ రోజు ఎపిసోడ్ తనూజ (Tanuja) జర్నీతో ప్రారంభమైంది. బిగ్ బాస్ స్వయంగా తనూజను ఒక రేంజ్‌లో ప్రశంసిస్తూ, ఆమె హౌస్‌లో చేసిన ప్రయాణాన్ని గుర్తు చేసుకున్నారు. నటిగా ఇప్పటికే మంచి గుర్తింపు ఉన్నప్పటికీ, బిగ్ బాస్ హౌస్‌లో ఉండడం పూర్తిగా భిన్నమైన అనుభవమని బిగ్ బాస్ పేర్కొన్నారు.

బిగ్ బాస్ మాట్లాడుతూ, హౌస్‌లో నటించడం కుదరదని, అక్కడి పరిస్థితులు నిజమైనవని చెప్పారు. అలాంటి పరిస్థితుల్లోనూ తనూజ ధైర్యంగా నిలబడి, బలంగా గేమ్ ఆడిందని ప్రశంసించారు. ఇతరుల సపోర్ట్ కోసం పాకులాడుతుందనే విమర్శలను ఆమె తట్టుకుని ముందుకు సాగిందని, బంధాలు ఎదురైనప్పుడు ఆమె సున్నితత్వం బయటపడిందని అన్నారు. అవసరమైన సందర్భాల్లో భావోద్వేగాలను పక్కనపెట్టి తనలోని ధైర్యాన్ని చూపించిందని బిగ్ బాస్ స్పష్టం చేశారు. ఇది ఆమె జర్నీకి ప్రత్యేక గుర్తింపుగా నిలిచిందని వ్యాఖ్యానించారు.

ఆ తర్వాత తనూజ హౌస్‌లో చేసిన అల్లరి, కన్నీళ్లు, బంధాలకు సంబంధించిన దృశ్యాలను ఏవీ (AV) రూపంలో ప్రదర్శించారు. ఈ వీడియోలు చూసిన తనూజ భావోద్వేగానికి లోనైంది. ఎక్కడో పుట్టిన తాను ఈ స్థాయికి రావడానికి కారణం తనను ఆదరించిన ప్రేక్షకులేనని ఆమె చెప్పింది. అనంతరం హౌస్‌లోకి వెళ్లి తన ఆనందాన్ని ఇతర సభ్యులతో పంచుకుంది. ముఖ్యంగా కళ్యాణ్ (Kalyan)తో కలిసి ఉన్న సీన్స్ చూపించినప్పుడు ఆమె మరింత ఉత్సాహంగా స్పందించింది. ఇద్దరి మధ్య జరిగిన సంభాషణలు, పాత జ్ఞాపకాలు చూపించడంతో ‘సంథింగ్ సంథింగ్’ పుకార్లు మరింత బలపడ్డాయి.

అనంతరం బిగ్ బాస్ డిమాన్ పవన్ (Demon Pawan) జర్నీపై దృష్టి పెట్టారు. పవన్ శక్తి, సామర్థ్యాలను ప్రశంసిస్తూ, ప్రేమించిన వారి కోసం నిలబడే అతని వ్యక్తిత్వాన్ని అభినందించారు. ప్రేమించిన వ్యక్తి హౌస్ నుంచి బయటకు వెళ్లినప్పుడు పవన్ ఎంతగా బాధపడ్డాడో తాను గమనించానని బిగ్ బాస్ తెలిపారు. పవన్‌కు సంబంధించిన ఏవీలు చూపించడంతో అతడు కూడా ఎమోషనల్ అయ్యి బిగ్ బాస్‌కు కృతజ్ఞతలు తెలిపాడు. ఇలా బిగ్ బాస్ 9 (Bigg Boss 9) చివరి వారం ఎపిసోడ్లు భావోద్వేగ క్షణాలతో ప్రేక్షకులను ఆకట్టుకుంటున్నాయి.