నిధి అగర్వాల్‌కు చేదు అనుభవం.. మాల్ యాజమాన్యంపై కేసు నమోదు చేసిన పోలీసులు

హీరోయిన్ నిధి అగర్వాల్ (Nidhhi Agerwal)తో కొందరు అభిమానులు ప్రవర్తించిన తీరు ఇప్పుడు టాలీవుడ్‌లో తీవ్ర చర్చకు దారి తీసింది. బుధవారం డిసెంబర్ 17న హైదరాబాద్‌లో జరిగిన ది రాజా సాబ్ (The Raja Saab) సినిమా పాటల విడుదల కార్యక్రమంలో ఈ దుర్ఘటన చోటు చేసుకుంది. ఈ ఘటనపై ప్రముఖ సింగర్ చిన్మయి (Chinmayi Sripaada) సహా పలువురు సినీ ప్రముఖులు స్పందిస్తూ అభిమానుల ప్రవర్తనను తీవ్రంగా ఖండిస్తున్నారు. మహిళా సెలబ్రిటీల భద్రతపై మరోసారి ప్రశ్నలు తలెత్తేలా ఈ సంఘటన మారింది.

హైదరాబాద్‌లోని ఒక ప్రైవేట్ మాల్‌లో నిర్వహించిన ‘సహానా సహానా’ పాట విడుదల ఈవెంట్‌కు నిధి అగర్వాల్ హాజరయ్యారు. అయితే కార్యక్రమానికి ఊహించిన దానికంటే భారీ సంఖ్యలో అభిమానులు తరలిరావడంతో పరిస్థితి ఒక్కసారిగా అదుపు తప్పింది. నిధి అగర్వాల్‌తో ఫోటోలు దిగేందుకు అభిమానులు ఒకేసారి ఎగబడటంతో గందరగోళం నెలకొంది. ఈ క్రమంలో కొంతమంది ఆమెతో అసభ్యకరంగా, దురుసుగా ప్రవర్తించారని సమాచారం. సరైన భద్రతా ఏర్పాట్లు లేకపోవడమే ఈ పరిస్థితికి కారణమని పలువురు విమర్శిస్తున్నారు.

ఈ ఘటనకు సంబంధించిన వీడియోలు సోషల్ మీడియాలో వైరల్ కావడంతో విషయం మరింత తీవ్రతరమైంది. పరిస్థితి చేయి దాటడంతో బాడీ గార్డుల సహాయంతో నిధి అగర్వాల్‌ను అక్కడి నుంచి సురక్షితంగా బయటకు తీసుకెళ్లారు. కారు ఎక్కిన సమయంలో ఆమె తీవ్ర ఆగ్రహంతో పాటు మనస్తాపానికి గురైనట్లు వీడియోల్లో స్పష్టంగా కనిపించింది. ఈ సంఘటన ఆమెను మానసికంగా తీవ్రంగా కలచివేసిందని ఇండస్ట్రీ వర్గాలు చెబుతున్నాయి.

కాగా ది రాజా సాబ్ సినిమా పాటను సాయంత్రం 5 గంటలకు విడుదల చేయాల్సి ఉండగా, ఈవెంట్ ఆలస్యం కావడంతో మాల్‌లో జనం మరింతగా గుమిగూడారు. ఇదే సమయంలో ఈ అవాంఛనీయ ఘటన చోటు చేసుకుంది. ఈ విషయంపై పోలీసులు (Hyderabad Police) కేసు నమోదు చేశారు. సరైన అనుమతులు లేకుండా ఈవెంట్ నిర్వహించారనే ఆరోపణలతో మాల్ యాజమాన్యం, ఈవెంట్ నిర్వాహకులపై కూడా కేసులు నమోదు చేసినట్లు సమాచారం. నిధి అగర్వాల్ ఇప్పటివరకు అధికారికంగా స్పందించకపోయినా, ఆమె పట్ల జరిగిన ప్రవర్తనను సోషల్ మీడియాలో పెద్ద ఎత్తున ఖండిస్తున్నారు. ఇలాంటి ఘటనలు పునరావృతం కాకుండా కఠిన చర్యలు తీసుకోవాలని సినీ వర్గాలు డిమాండ్ చేస్తున్నాయి.