ఓటీటీలకు సెన్సార్ లేదని స్పష్టత: పార్లమెంట్‌లో కేంద్రం కీలక ప్రకటన

పార్లమెంట్‌లో తాజాగా ఓటీటీలకు సెన్సార్ (OTT Censorship) అనే అంశం చర్చకు వచ్చింది. సినిమాలకు సెన్సార్ బోర్డు (Censor Board) ఉండడం, థియేటర్లలో విడుదలయ్యే చిత్రాలు కచ్చితంగా నియమ నిబంధనల ప్రకారం సర్టిఫికేషన్ పొందాల్సి ఉండడం తెలిసిందే. అడల్ట్ కంటెంట్, న్యూడిటీ, అసభ్యకర పదాలు, మితిమీరిన రక్తపాతం వంటి అంశాలు లేకుండా సినిమాలను సెన్సార్ చేసి విడుదల చేస్తారు. ఒకవేళ అలాంటి అంశాలు ఉంటే, వాటికి తగినట్లుగా యూ, యూ ఏ, ఏ వంటి రేటింగ్స్ ఇస్తూ పెద్దలకే పరిమితం చేస్తారు.

అయితే ఓటీటీ ప్లాట్‌ఫాంలు (OTT Platforms) అందరికీ సులభంగా అందుబాటులో ఉండడంతో పరిస్థితి పూర్తిగా మారింది. నెట్‌ఫ్లిక్స్ (Netflix), అమెజాన్ ప్రైమ్ వీడియో (Amazon Prime Video) వంటి ఓటీటీల్లో అసభ్యకర డైలాగ్స్, అడల్ట్ కంటెంట్, న్యూడిటీ, ఎక్కువ రక్తపాతం ఉన్న సీన్స్ నేరుగా స్ట్రీమింగ్ అవుతున్నాయన్న విమర్శలు గత కొంతకాలంగా వినిపిస్తున్నాయి. ఓటీటీలకు ప్రత్యేకమైన సెన్సార్ బోర్డు లేకపోవడంతో ఇష్టమొచ్చినట్టుగా కంటెంట్ వస్తోందన్న అభిప్రాయం ప్రజల్లో పెరిగింది. ఈ నేపథ్యంలో ఓటీటీలను కూడా సెన్సార్ పరిధిలోకి తీసుకురావాలని పలువురు కోరారు. దీనిపై వివిధ స్థాయిల్లో చర్చలు కూడా జరిగాయి.

ఈ అంశంపై తాజాగా పార్లమెంట్‌లో కేంద్ర ప్రభుత్వం కీలక స్పష్టత ఇచ్చింది. లోక్‌సభలో ప్రశ్నకు సమాధానంగా కేంద్రం వెల్లడించిన వివరాల ప్రకారం, అన్ని ఓటీటీలు సెంట్రల్ బోర్డ్ ఆఫ్ ఫిల్మ్ సర్టిఫికేషన్ (Central Board of Film Certification) పరిధిలోకి రావని స్పష్టం చేసింది. ఇన్ఫర్మేషన్ టెక్నాలజీ, డిజిటల్ మీడియా ఎథిక్స్ రూల్స్ 2021 (Information Technology Rules 2021) ప్రకారం ఓటీటీ ప్లాట్‌ఫాంలు సెన్సార్ బోర్డు కిందకు రావని ప్రభుత్వం క్లారిటీ ఇచ్చింది. దీంతో ఓటీటీలకు సినిమాల్లా నేరుగా సెన్సార్ నిబంధనలు ఉండవన్న విషయం అధికారికంగా తేలిపోయింది.

అయితే సెన్సార్ లేకపోయినా, ఓటీటీలకు పూర్తిస్థాయి స్వేచ్ఛ ఇచ్చినట్లు కాదని కేంద్రం స్పష్టం చేసింది. కొన్ని కీలక నిబంధనలు మాత్రం తప్పనిసరిగా పాటించాల్సి ఉంటుందని తెలిపింది. చట్టం ద్వారా నిషేధించబడిన కంటెంట్ (Illegal Content), న్యూడిటీ కంటెంట్ (Nudity Content), ప్రైవసీకి భంగం కలిగించే అంశాలు ఓటీటీలు స్ట్రీమింగ్ చేయకూడదని మార్గదర్శకాల్లో పేర్కొన్నారు. అలాగే ఓటీటీల్లో ఉన్న కంటెంట్ ఏ వయసు వారికి అనుకూలమో స్పష్టంగా చూపించాల్సి ఉంటుంది. వయస్సు ఆధారిత కేటగిరీలతో (Age Based Classification) కంటెంట్‌ను విభజించి ప్రదర్శించాల్సిందే.

ఇంకా కంటెంట్ తయారుచేసే సంస్థలే స్వీయ నియంత్రణ (Self Regulation) పాటించాలని కేంద్రం సూచించింది. ప్రతి ఓటీటీ సంస్థలో ప్రత్యేకంగా ఒక అంతర్గత నియంత్రణ టీమ్ ఉండాలి. న్యూడిటీ, ప్రైవసీ లేదా చట్ట వ్యతిరేక అంశాలపై ఫిర్యాదు వచ్చినట్లయితే, కేంద్రం దృష్టికి వచ్చిన 24 గంటల్లోనే ఆ కంటెంట్‌ను తొలగించాల్సి ఉంటుంది. అంతేకాదు, కేంద్ర ప్రభుత్వ యంత్రాంగం ఓటీటీలను ఎప్పటికప్పుడు పర్యవేక్షిస్తుందని కూడా లోక్‌సభలో వెల్లడించారు.

ఈ నిర్ణయంతో ఓటీటీలపై కొంతవరకు నియంత్రణ ఉండబోతున్నప్పటికీ, పూర్తిస్థాయి సెన్సార్ లేకపోవడం వల్ల అసభ్య పదజాలం, మితిమీరిన రొమాన్స్, హింసాత్మక సన్నివేశాలు (Violence Scenes) పూర్తిగా తగ్గిపోవని విశ్లేషకులు అంటున్నారు. న్యూడిటీ, చట్ట వ్యతిరేక కంటెంట్ వరకు మాత్రమే కట్టడి చేసే అవకాశం ఉండగా, మిగతా అంశాల్లో ఓటీటీలకు స్వేచ్ఛ ఎక్కువగానే ఉంటుందని తెలుస్తోంది. దీంతో రాబోయే రోజుల్లో ఓటీటీ కంటెంట్‌పై సమాజంలో చర్చలు మరింత పెరిగే అవకాశం ఉందని అభిప్రాయాలు వ్యక్తమవుతున్నాయి.